വലിയ അംഗീകാരങ്ങൾക്കു മുന്നിൽ നിൽക്കുമ്പോഴും കൃഷിയെ കയ്യൊഴിയാൻ സൈഫുല്ല ഒരുക്കമല്ല. യുവ കർഷക പുരസ്കാര ജേതാവ് മലപ്പുറം വറ്റല്ലൂർ കരിഞ്ചാപ്പാടി പി. സൈഫുല്ല വീണ്ടും കൃഷിയെ ഔദ്യോഗികമായി പഠിക്കാൻ ഇറങ്ങുകയാണ്. ഇതുവരെ പാടത്ത് പ്രാവർത്തികമാക്കിയത് ഇനി പാഠപുസ്തകത്തിലൂടെ പഠിക്കും. ഒരുപക്ഷേ ഒരു കൃഷി ശാസ്ത്രജ്ഞനോ കൃഷി ഓഫിസറോ കൃഷി സംരംഭകനോ ഗവേഷകനോ അധ്യാപകനോ ആയി സൈഫുല്ല മാറിയേക്കാം. അപ്പോഴും ഹൃദയത്തിലുണ്ട് പച്ചപ്പണിഞ്ഞ ഒരു പ്രതിജ്ഞ; കൃഷി വിട്ടൊരു ജീവിതമില്ല. തൃശൂരിൽ കാർഷിക സർവകലാശാലയിൽ ബിഎസ്‌സി (ഓണേഴ്സ്) അഗ്രികൾച്ചർ കോഴ്സിലേക്ക് സൈഫുല്ലയ്ക്ക് നേരിട്ട് പ്രവേശനം ലഭിച്ചിരിക്കുന്നു. ചെറുപ്രായത്തിലേ കൃഷിമേഖലയിൽ ആർജിച്ചെടുത്ത മികവുകളും നേട്ടങ്ങളും പരിഗണിച്ചാണ് ഈ അംഗീകാരം.