ഓട്ടത്തിനിടെ കാർ കത്തി; ഷോർട്ട് സർക്യൂട്ടെന്ന് പ്രാഥമിക നിഗമനം

മാനന്തവാടി ∙ എടവക അമ്പലവയൽ ജംക്‌ഷനിൽ, ഓടിക്കൊണ്ടിരുന്ന കാറിനു തീപിടിച്ചു. വാഹനം ഓടിച്ചിരുന്ന എടവക രണ്ടേനാൽ മന്ദങ്കണ്ടി യാസിൻ പുക ഉയരുന്നതു കണ്ടതോടെ ഇറങ്ങി ഓടിയതിനാൽ അപകടം ഒഴിവായി. മാനന്തവാടി അഗ്നിരക്ഷാ യൂണിറ്റ് ഉടൻ സ്ഥലത്തെത്തി തീ അണച്ചു. കാറിന്റെ എൻജിനും പിറകിലെ സീറ്റുകളും കത്തി നശിച്ചു. ഇന്നലെ വൈകിട്ടു മൂന്നോടെയായിരുന്നു അപകടം. ഷോർട്ട് സർക്യൂട്ടാണ് തീ പിടിക്കാൻ കാരണമെന്നാണു പ്രാഥമിക നിഗമനം. സീനിയർ ഫയർ ഓഫിസർ സെബാസ്റ്റ്യൻ ജോസഫ്, ഫയർ ഓഫിസർമാരായ പി.കെ. അനീഷ്, കെ. സുധീഷ്, വി.ആർ. മധു, ആർ.സി. ലെജിത്ത് എന്നിവരുടെ നേതൃത്വത്തിലാണ് തീ അണച്ചത്. മാനന്തവാടി പൊലീസും സ്ഥലത്തെത്തിയിരുന്നു.