മുണ്ടക്കയം സ്വദേശിയെ തട്ടിക്കൊണ്ടുപോയ കേസ്: 2 പേർ കൂടി പിടിയിൽ

വടക്കാഞ്ചേരി ∙ മുണ്ടക്കയം സ്വദേശിയായ യുവാവിനെ തട്ടിക്കൊണ്ടുപോയി കല്ലംപാറയിലെ തടങ്കലിൽ വച്ചു മർദിച്ച് ദൃശ്യങ്ങൾ പകർത്തി മോചനദ്രവ്യം ആവശ്യപ്പെടുകയും ഒരുലക്ഷം രൂപയും മൊബൈൽ ഫോണും തട്ടിയെടുക്കുകയും ചെയ്ത കേസിൽ 2 പ്രതികളെ കൂടി അറസ്റ്റ് ചെയ്തു. കോട്ടയം കഞ്ഞിക്കുഴി സ്വദേശി പുതുപറമ്പിൽ ശരത് രാജ് (20), തെക്കുംകര കല്ലംപാറ ചെമ്പ്രങ്ങോട്ടിൽ ഗിജേഷ് (26) എന്നിവരെയാണ് ബെംഗളൂരുവിൽ നിന്നു കസ്റ്റഡിയിൽ എടുത്തത്. കേസിലെ 3 പ്രതികളെ കഴിഞ്ഞ മാസം 13ന് അറസ്റ്റ് ചെയ്തിരുന്നു. ശരത് രാജ് കോട്ടയം ജില്ലയിലെ ഒട്ടേറെ കേസുകളിൽ പ്രതിയാണ്. കോട്ടയം, തൃശൂർ, എറണാകുളം ജില്ലകളിലേക്ക് എംഡിഎംഎ കടത്തുന്ന പ്രധാന കണ്ണികളാണ് അറസ്റ്റിലായവർ.