കുളവിക്കൂട് കത്തിച്ചു

എരുമേലി ∙ വീടിനു മുറ്റത്തെ മരത്തിൽ ഭീഷണിയായി നിന്ന കുളവിക്കൂട് സന്നദ്ധ പ്രവർത്തകർ ഇടപെട്ട് കത്തിച്ചു. മുക്കൂട്ടുതറ പനയ്ക്കവയൽ കെഒടി റോഡ് ചീനിവേലിൽ രാജന്റെ വീടിന്റെ മുന്നിലെ 2 ആൾ പൊക്കമുള്ള റബർ മരത്തിലാണു മനകുളവി കൂടുകൂട്ടിയത്. ഇതു സംബന്ധിച്ച് മനോരമ വാർത്ത കണ്ട് കുളവിക്കൂടു നശിപ്പിക്കുന്നതിനു യുവാക്കൾ മുന്നോട്ടുവരികയായിരുന്നു. 

കൊല്ലമുള സന്തോഷ് കവല സ്വദേശികളായ സുനിൽ, ജിബിൻ, ടിജോ തുടങ്ങിയവരാണ് കുളവിക്കൂട് കരിക്കുന്നതിനു മുന്നോട്ടുവന്നത്. ഇന്നലെ രാത്രി 8 മണിയോടെ പന്തം ഉപയോഗിച്ച് ഇവർ കൂട് കത്തിച്ചു. ഒരു ഫുട്ബോളിന്റെ വലുപ്പവും രൂപവുമാണ് കൂടിനുണ്ടായിരുന്നത്. ഏതാനും ദിവസമായി കുളവികൾ വീടിന്റെ ഉള്ളിൽവരെ എത്തിയതോടെ വീട്ടുകാർ ഭയത്തിലായിരുന്നു.