22 ഗ്രാം രാസലഹരിയുമായി 3 പേർ പിടിയിൽ

ആലപ്പുഴ ∙ ലഹരിമരുന്നു മൊത്തവ്യാപാരി ഉൾപ്പെടെ മൂന്നുപേർ 22 ഗ്രാം രാസലഹരിയുമായി പിടിയിൽ. കൊടുങ്ങല്ലൂർ പുത്തൻവേലിക്കര ഇളയോടത്ത് റഹിം (സല്ലു - 32), ആലപ്പുഴ കഞ്ഞിക്കുഴി വേലിയകത്ത് രഞ്ജിത്ത് (24), മായിത്തറ കുടിലിങ്ങൽ ഡിൽ മോൻ (സോനു–25) എന്നിവരെയാണു പൊലീസ് പിടികൂടിയത്. ഡിൽമോൻ ലഹരിമരുന്നു മൊത്തവ്യാപാരിയാണന്ന് പൊലീസ് പറഞ്ഞു. ബെംഗളൂരുവിൽ നിന്നു ലഹരി മരുന്നു വാങ്ങി ഗ്രാമിന് 3,000 – 5,000 രൂപയ്ക്കാണു വിൽക്കുന്നതെന്നു പ്രതികൾ പൊലീസിനോടു പറഞ്ഞു. 

ചേർത്തല, മുഹമ്മ, മാരാരിക്കുളം സിഐമാരുടെ നേതൃത്വത്തിലുള്ള പൊലീസും ജില്ലാ ലഹരി വിരുദ്ധ സ്ക്വാഡും ചേർന്നു സംഘത്തെ കുടുക്കുകയായിരുന്നു. നർകോട്ടിക് സെൽ, എഎസ്പി: എസ്.ടി. സുരേഷ് കുമാറിന്റെ നേതൃത്വത്തിലുള്ള ഡാൻസാഫ് ടീമും ചേർത്തല ഡിവൈഎസ്പി: കെ.വി. ബെന്നി, ആലപ്പുഴ ഡിവൈഎസ്പി: എൻ.ആർ. ജയരാജ് എന്നിവരുടെ നേതൃത്വത്തിലുള്ള പ്രത്യേക സംഘവും പരിശോധന നടത്തി. ചേർത്തല സിഐ: വിനോദ് കുമാർ, മുഹമ്മ സിഐ: രാജ്കുമാർ, മാരാരിക്കുളം സിഐ: എ.വി.ബിജു, എസ്‌സിപിഒ: ശ്യാം എന്നിവരും സംഘത്തിലുണ്ടായിരുന്നു.